Հայաստան և հայ ժողովուրդ. երկարաժամկետ նպատակ և ձգտում, միջնաժամկետ խնդիրներ ու մարտահրավերներ, ներկա գոյութենական սպառնալիքներ
• Մարդը կենսաբանական, հասարակական,
էթնո-մշակութային և հոգեմտավոր ամբողջական էակ է:
• Մարդն իր ամբողջական էությունն
իրացնում է, երբ իրացնում է այդ էության բոլոր բաղադրիչներից բխող պահանջները, կարիքները,
մղումներն ու ցանկությունները:
• Մարդու լիարժեք ինքնաիրացման
վիճակը նրա ազատ ստեղծագործման, արարման վիճակն է, որը ենթադրում է լիարժեք (արտաքին
և ներքին) ազատություն և արարման ներքին մղում:
Ներդաշնակ հասարակությունն այն հասարակությունն է, որտեղ յուրաքանչյուր անհատ
հնարավորություն ունի, այլոց հետ համերաշխության և ներդաշնակության պայմաններում, ամբողջությամբ իրացնելու իր էությունը, որտեղ մեկի
էության ամբողջական կամ մասնակի իրացման հնարավորությունը պայմանավորված չէ ուրիշի
այդ հնարավորությունից զրկմամբ:
• Ազգը ծնվել է էթնո-մշակութային
ընդհանուր ինքնության տեր մարդկանց հավաքականությունից ու նրանց տեւական փոխհարաբերությունից:
Նա տվյալ պահին այդ հավաքականությունը բաղկացնող անհատների գումարը չէ սոսկ, այլ այդ
ինքնությունից ձեւավորված և սերնդից սերունդ ժառանգվող հոգեվոր-մշակութային էությունը:
Ազգի էության իրացումը
կայանում է իր և իր անդամների տվյալ ժամանակի անհատական և հավաքական ինքնաիրացման պայմանների
ապահովման, իր (ազգի) հոգեւոր-մշակութային էության իրացման և տեւապես կատարելագործման,
իր հարատեւության ապահովման, ինչպես նաեւ մյուս ազգերի և էթնո-մշակութային հավաքականությունների
ինքնաիրացման նպաստման և բոլորի համերաշխ համագործակցությունից ձեւավորված ներդաշնակ
աշխարհի կայացման տեւական ձգտումին մեջ:
ii. Մշտական նպատակ և ձգտում
Հայ ազգի և ներկա Հայաստանի
նպատակը, մշտական ձգտումն է`
1. Հայ ժողովրդի համախմբումն
իր պատմական բնօրրան Հայաստանում` հայկական բարձրավանդակում:
2. Ամբողջական Հայաստանում
ներդաշնակ հասարակության կայացումը, հասարակության անխտիր բոլոր անդամների ինքնաիրացման
ապահովումը:
3. Հայ ազգի ինքնաիրացումը:
iii. Միջնաժամկետ նպատակներ
և խնդիրներ
Ներկա Հայաստանի և հայ
ժողովրդի կենսունակության ապահովման ու ամրապնդման և ազգի մշտական նպատակի իրականացման
պայմանների հասունացման համար անհրաժեշտաբար լուծում պահանջող միջնաժամկետ խնդիրներն
են.
1. Ներկա Հայաստան պետությունում
(Արցախը ներառյալ)` հայ ժողովրդի և պետության բոլոր քաղաքացիների ինքնաիրացման նախադրյալների,
հասարակական արժանապատիվ և համերաշխ համակեցության ապահովում:
2. Ներկա Հայաստան պետության
(Արցախը ներառյալ)առավելագույն հնարավոր գերիշխանության ձեռքբերում, այլ ուժերի նկատմամբ
ուղղակի և անուղղակի ենթակայեցվածության բացառում:
3. Ներկա Հայաստան պետության
(Արցախը ներառյալ)աշխարհքաղաքական, առաջին հերթին Թուրքիայի և Ադրբեջանի նկատմամբ անվտանգության
ապահովում:
4. Պատմական արդարության
հաստատման, տարածքային մասնատման արդյունքում երկրի կենսունակության առումով ստեղծված
անհեռանկարային իրավիճակը վերացնելու և ընդհանրապես
աշխարհքաղաքական անվտանգության ապահովման նպատակներով` ներկա Հայաստան պետության կենսունակ
և պաշտպանունակ տարածքի ու սահմանների ապահովում, առաջին հերթին Նախիջեւանի հարցի լուծում:
5. Ժողովրդագրական ճգնաժամի
լուծում. ծննդաբերության մակարդակի աճի պայմանների ապահովում, օրինաչափ նվազագույնից
ավելի արտագաղթի բացառում, հայրենադարձության պայմանների ապահոուում և գործընթացի իրականացում:
6. Սփյուռքում հայրենադարձության
իրականացում, հայկականության իմաստավորում:
7. Աշխարհում ավելի համերաշխ,
արդար և հավասարամետ համակարգի ձեւավորման պայքարին մասնակցություն և ներդրման սատարում:
Այս մարտահրավերների բարվոք
լուծումը ներկա Հայաստանը կդարձնի այն ամուր կռվանը, որը հայ ժողովրդին հնարավորություն
կտա իրականացնել ազգի ամբողջական, երկարաժամկետ նպատակը:
iv. Ներկա գոյութենական սպառնալիքներ
Ներկայում սակայն Հայաստանն
ու հայ ժողովուրդը դիմագրավում են գոյութենական
նշանակության լրջագույն սպառնալիքներ, որոնք չչեզոքացնելու պարագայում նրանց առաջ հառնելու
է լինել չլինելու խնդիրը: Դրանք են
• ժողովրդագրական համաղետը,
• բնապահպանական համաղետը,
• Ադրբեջանի հետ անհավասար
պատերազմի հավանականության մեծացող վտանգը և
• Ռուսաստանի նկրտումների
պատճառով տարածքային և ինքնիշխանության լրացուցիչ կորուստներ կրելու վտանգը:
Առանց այս սպառնալիքների
չեզոքացման հնարավոր չէ ունենալ կենսունակ երկիր և անցնել միջնաժամկետ խնդիրների և
ապա երկարաժամկետ նպատակի լուծման:
Ներկայում Հայաստանի և
հայ ժողովրդի առաջնային մարտահրավերն այս սպառնալիքների չեզոքացումն է:
Comments
Post a Comment