Հայաստանի տարածաշրջանային, անվտանգային և արտաքին քաղաքականությունը` համաշխարհային փոխակերպումների պայմաններում
Ինչպես ամբողջ աշխարհում,
նույնպես և մեր տարածաշրջանում առաջիկա մի քանի տասնամյակների աշխարհքաղաքական գործընթացները
կարեւոր չափով պայմանավորված են լինելու խորագույն նշանակության և համապարփակ այն փոխակերպումներով, որոնց հորձանուտում է գտնվում
աշխարհը ներկայում:
Միջնաժամկետ փուլում Հայաստանի
տարածաշրջանային, անվտանգային և արտաքին քաղաքականությունը պետք է համապատասխանի աշխարհքաղաքական այն իրավիճակին,
որն ամենայն հավանականությամբ տիրելու է մեր տարածաշրջանում` ընթացող համաշխարհային
մաշտաբի փոխակերպումների արդյունքում:
Ներկա և կարճաժամկետ քաղաքականությունը
եւս, առկա խնդիրները լուծելուն և սպառնալիքները չեզոքացնելուն զուգահեռ, պետք է միտված
լինի նշված ոլորտներում միջնաժամկետ փուլում սպասվող աշխարհքաղաքական իրավիճակին պատրաստված
լինելուն:
Որո՞նք են համաշխարհային
նշանակության փոխակերպումները և աշխարհքաղաքական ի՞նչ իրավիճակ է սպասվում մեր տարածաշրջանում
դրանց արդյունքում:
• Աշխարհը գտնվում է համապարփակ
անկայունության* փուլում: Ինչպես բոլոր մյուս բնագավառներում, աշխարհքաղաքական և միջազգային
հարաբերությունների բնագավառում եւս* տիրում է խիստ անկայունություն, որը հակված է
առաջիկա ժամանակներում միայն ավելի բարդանալու: Ընդհանուր անկայունության պատճառը կապիտալիստական
համակարգի ճգնաժամն* է, իսկ աշխարքաղաքական անկայունությանը, ընդհանուր պատճառի հետ
մեկտեղ` աշխարհում հեգեմոն ուժի բացակայությունը*:
• Ավարտվել է ԱՄՆ հեգեմոն
ցիկլը* և ներկայում չկա համաշխարհային հեգեմոն ուժ: ԱՄՆ-ը շարունակում է մնալ ամենահզոր
պետությունը, բայց արդեն չունի ոչ կարողությունը,
ոչ էլ ցանկությունը լինելու աշխարհի հեգեմոն ուժը, առավել եւս ոստիկանը: Ավելին. նրա
հարաբերական ազդեցությունը շարունակելու է թուլանալ: Չինաստանն ԱՄՆ-ի գլխավոր մրցակիցն
է բայց շատ հեռու է աշխարհի մաշտաբով հեգեմոն ուժ լինելուց: Ներկայում չի էլ ցանկանում
լինել այդպիսին: Ապագայում չի կարողանալու, անգամ եթե ցանկանա:
• Պատմությունը ցույց է տալիս,
որ նման պայմաններում Ձեւավորվում են տարածաշրջանային հեգեմոններ*, գերիշխող ուժեր
և նրանց շուրջ ձեւավորվող բլոքներ:
• Այսրկովկասն ընդգրկող լայն
տարածաշրջանում տեսականորեն հեգեմոն դառնալու հավակնություն կարող են ներկայացնել երեք
ուժեր. Ռուսաստանը, Իրանը և Թուրքիան:
Ռուսաստանն իր բնույթով կայսերական
երկիր է և շարունակում է մնալ այդպիսին: Բայց որպես տերություն այն գտնվում է իր մայրամուտում*:
Նրա մարումը թվում է անխուսափելի: Լրջագույն
խնդիրները, որոնց դեմ հանդիման է գտնվում այդ երկիրը, եթե ոչ կարճ, ապա միջին ժամկետում
վստահաբար հարցականներ են առաջացնելու նրա միասնական կամ կենտրոնաձիգ գոյության շարունակման
առումով: Գործնականում, Ռուսաստանի տարածաշրջանային հեգեմոն դառնալու հավանականությունը
համարյա բացառվում է:
Իրանը եւս գտնվում է բազում խնդիրների առաջ և հեռանկարների առումով, առնվազն
ներկա դրությամբ, գտնվում է Թուրքիայից հետ մնացած կարգավիճակում:
Տարածաշրջանային հեգեմոն դառնալու ամենալուրջ թեկնածուն, իր դիմագրաված խնդիրներով
հանդերձ, մնում է Թուրքիան*: Այդ երկիրն ունի իր աշխարհագրական լայն տարածաշրջանի
(մերձավոր արեւելք, բալկաններ, արեւելյան Միջերկրական, Սև և Կասպից ծովերի ավազաններ,
ներառյալ Այսրկովկասը) գերիշխող ուժը դառնալու թե' հավակնություն, և թե' որոշ նախադրյալներ:
• Իր հետեւողական թուլացման
պատճառով Ռուսաստանը ուշ կամ շուտ հեռանալու է այսրկովկասից, Կովկասից:
Համաշխարհային առումով իր հեգեմոն դիրքը կորցնելու, հարաբերական հզորության
լրացուցիչ թուլացման և իր աշխարհքաղաքական առաջնահերթությունների փոփոխման պատճառով
ԱՄՆ-ը եւս միջին ժամկետում այս տարածաշրջանում չի ունենալու ռազմավարական ներկայություն:
Նման պայմաններում Այսրկովկասում և Միջին Ասիայում Ռուսաստանի տեղը անպայման
փորձելու է գրավել Թուրքիան: Որքան մոտենա այդ հավանականության իրականանալու պահը,
այնքան մեծանալու է Հայաստանի գլխավերեւում ճոճվող, նրա գոյության սպառնացող լրջագույն
վտանգը, ոչ միայն պատմական թշնամանքի, այլ, առաջին հերթին` Թուրքիայի ռազմավարական
այդ նպատակի իրականացման ճանապարհին ցցված խոչընդոտ համարվելու պատճառով:
Ի՞նչ պետք է անի Հայաստանը,
թույլ չտալու համար նման հավանականության իրականացումը:
Հայաստանն անշուշտ պետք
է անխտիր բոլոր առումներով, տվյալ պարագայում առաջին հերթին ռազմական ու անխոցելիության
առումներով դառնա հզոր երկիր:
Հզորության մյուս բաղադրիչներից
է առավելագույն հնարավոր պետական գերիշխանությունը, ինքնուռույնությունը: Հաշվի առնելով
Հայաստանի ենթակայեցվածության և կախվածության ներկա վիճակը, գերիշխանության և ինքնուռույնության
ձեռք բերումը առաջին հերթին պահանջում է, որ վերջ դրվի Ռուսաստանի հետ գերակա/ենթակա,
վասալային հարաբերություններին և երկու երկրների միջեւ հաստատվեն արժանապատիվ հարաբերություններ:
Մյուս կողմից սակայն, հզորության
ձեռք բերման այս և մյուս նախադրյալների իրականացումը,
ինչ խոսք, ժամանակ պահանջող գործընթաց է: Չափազանց կարեւոր է, որ Հայաստանն անհրաժեշտ
հզորությունը ձեռք բերած լինի մինչեւ այն պահը, երբ Այսրկովկասն ու հատկապես մեր երկիրը կհայտնվի աշխարհքաղաքական
դատարկության մեջ, այսինքն Ռուսաստանն ամբողջությամբ հեռացած կլինի այս տարածաշրջանից:
Դա այդպես է, որովհետեւ հզորություն դեռեւս ձեռք չբերված պայմաններում ստեղծված դատարկությունից
միակ օգտվողը կարող է լինել Թուրքիան: Այդ
պատճառով էլ, Հայաստանի ու հայ ժողովրդի ազգային ու պետական գերագույն` գոյութենական
շահը պահանջում է, որ մինչեւ իր կողմից բավարար հզորության ձեռք բերումը մեր երկիրըն
աշխարհքաղաքական առումով շարունակի մնալ Ռուսաստանի ազդեցության գոտում:
Ասվածը կարող է ոմանց կողմից համարվել
թույլ կամքի դրսեւորում, թաքուն կամ բացահայտ «ռուսամետություն», նույնիսկ «սրբապղծություն»:
Նման արձագանգը չի լինի այլ բան, քան հարցերը կարճատես, զգացական ու կամապաշտ, ոչ առարկայական
ու ոչ համակողմանի կերպով դիտարկելու արդյունք:
Կասկած չկա. Հայաստանը
բոլորի, ներառյալ Ռուսաստանի նկատմամբ պետք է ձեռք բերի բոլոր առումներով, ներառյալ
աշխարհքաղաքական ազդեցության առումով առավելագույն
գերիշխանություն: Բայց եթե սեփական ուժերի դեռևս անբավարարության պատճառով այսրկովկասը
անխուսափելիորեն պետք է լինի ինչ որ ուժի ազդեցության գոտի, ապա Հայաստանի շահերից
աներկբայորեն բխում է, որ այդ ուժը լինի Ռուսաստանը և ոչ թե Թուրքիան: Հայաստանի շահերից
չի բխում Ռուսաստանի աշխարհքաղաքական հեռացման արագացումը,, առավել եւս արագացման գործընթացին
իր կողմից նպաստումը, եթե այդ հեռացմանը հաջորդելու
է ոչ թե ինքնիշխան և անվտանգ Հայաստանի առկայությունը, այլ ռուսական ներկայության փոխառինումը
ավելի վտանգավոր և ագռեսիվ Թուրքիայով*:
Արդյո՞ք Ռուսաստանին առնչվող
այդ երկու մոտեցումները, մի կողմից ոչ-վասալային, արժանապատիվ հարաբերությունների հաստատումն
ու մյուս կողմից այդ երկրի աշխարհքաղաքական ներկայության պահպանումը համատեղելի են:
Բարեբախտաբար այո':
Ավելորդ է ասելն անգամ,
որ Ռուսաստանը այսրկովկասում, տվյալ դեպքում Հայաստանում գտնվում է բացառապես իր շահերի
պաշտպանության համար: Այդ ներկայությունը Ռուսաստանին հնարավորություն է տալիս լուծել
երկու խնդիր, մին արտաքին բնույթի էքսպանսիվ, մյուսը պաշտպանական: Այսրկովկասը կատարում է դեպի Թուրքիա ու Իրան, Մերձավոր
Արեւելք ու Միջերկրական պլացդարմի դերակատարություն: Բայց դրանից էլ կարեւոր է և գնալով
ավելի մեծ կարեւորություն է ստանալու այդ ներկայության պաշտպանական նշանակությունը:
Կովկասյան լեռնաշղթան Ռուսաստանի
համար ունի պաշտպանական պատվարի կարեւորագույն նշանակություն: Կովկասից այն կողմ բացվում
է հարթավայրային մի անծայրածիր տարածաշրջան, որը ներառում է Մոսկվան ու բազմաթիվ մեծ
քաղաքներ, երկրի բնակչության ու տնտեսության
մեծագույն մասը:
Այսրկովկասը Կովկասյան
պատվարի նախադուռն է: Այսօր կորցնել այսրկովկասը նշանակում է վաղը կորցնել Կովկասը.
իսկ Կովկասի կորուստը նշանակում է Ռուսաստանի վերջը:
Ռուսաստանի շարունակական թուլացմամբ նրա համար ավելի է կարեւորվելու այդ պատվարի
պահպանման արժեքը: Ու դրանով` նաեւ Հայաստանի արժեքը:
Հայաստանը, համաձայնվելով
Ռուսաստանի աշխարհքաղաքական ներկայության պահպանմանը, ռազմավարական նշանակության նպաստ
է բերում Ռուսաստանին` ապահովելու իր կովկասյան դարպասների անվտանգությունն ու ընդհանուր
պաշտպանությունը: Պահպանելով իր աշխարհքաղաքական ներկայությունը Հայաստանում, Ռուսաստանն
արգելակում է նաեւ Թուրքիայի ռազմավարական ներթափանցումը, էքսպանսիան դեպի Այսրկովկաս,
ու այդքանով սատարում Հայաստանի ռազմավարական շահերին: Շահերը, հետեւաբար, փոխադարձ են, ոչ միակողմանի:
Հայաստանը, իր ազգային
ու պետական շահերից ելնելով, պետք է կարողանա Ռուսաստանի հետ հանգել մի կողմից իր գերիշխանության
հարգման ու մյուս կողմից նրա աշխարհքաղաքական ներկայության շարունակման շուրջ փոխադարձ
համաձայնության: Հայաստանը պետք է պատրաստակամություն հայտնի երաշխիքներ տալու Ռուսաստանին,
որ ինք չի դառնալու այլ ուժերի ազդեցության գոտի և չի փորձելու տարածաշրջանային աշխարհքաղաքական
ազդեցության առումով ձերբազատվել ռուսական ազդեցությունից ՊԱՅՄԱՆՈՎ, որ Ռուսաստանն իր հերթին երաշխիքներ տա, որ ընդունում
է մնացած բոլոր առումներով Հայաստանի գերիշխանությունը և չի միջամտելու նրա գործերին:
Պետք է փորձել իրարից տարանջատել
հայռուսական հավասար և արժանապատիվ հարաբերությունների («ապավասալացման», «ապագաղութացման»)
խնդիրն ու Կովկասից հարավ անվտանգության առումով ազդեցության գոտու խնդիրը: Հայաստանում
կարծես թե չի եղել նման տարանջատում: Առկա է եղել և շարունակում է լինել կամ Ռուսաստանին
ամբողջական ինքնահանձնվում, իր բոլոր վատ հետեւանքներով, և կամ թուրքական իրական վտանգն
անտեսող, լավագույն դեպքում թերագնահատող, արեւմուտքի արժեքների ու նրա միջամտելու
ունակության նկատմամբ միամիտ ու վտանգավոր գերագնահատումով ուղեկցված ամբողջական հակառուսականություն:
Առաջիկա ժամանակներում
Հայաստանի դիվանագիտության գլխավոր խնդիրը պետք է լինի, հիմնվելով հարցերի տարանջատման
մոտեցման վրա, հասնել Ռուսաստանի հետ այդպիսի
փոխհամաձայնության ձեռքբերման: Ռուսաստանի կողմից առաջ քաշված` «Հայաստանը գնալու տեղ
չունի» թեզիսին պետք է հակադարձել «Ռուսաստանն այլընտրանք չունի» թեզիսը և նրա մոտ
գնալով ավելի արմատավորել այդ համոզումը: Ռուսաստանը կարող է համաձայնվել հրաժարվել
Այսրկովկասում (Հայաստանում) այլ շահաքրքրվածություններից, պայմանով, որ անվտանգության
առումով այն շարունակի մնալ իր, այլ ոչ այլ ուժի ազդեցության գոտի:
Ակներեւ է ի հարկե, որ
չնայած իր հետեւողական թուլացման, իսկ ավելի ճիշդ կլինի ասել` այդ թուլացման իսկ պատճառով,
Ռուսաստանը վերջին տարիներին ցուցաբերում է ագռեսիվ արտաքին քաղաքականություն: Եթե
այդ քաղաքականությունը նախկին ԽՍՀՄ սահմաններից դուրս իրական արդյունքների հասնելու
հավանականություն համարյա չունի, ապա Մոսկվան շատ լուրջ է տրամադրված նախկին ԽՍՀՄ առավելագույն թվով հանրապետություններում իր ամբողջական
փաստացի վերահսկողությունը վերականգնելու ուղղությամբ: Այսրկովկասում նրա ձգտումն է
Ադրբեջանը վերադարձնել իր ազդեցության գոտի, էլ ավելի ընդլայնել իր ազդեցությունը Հայաստանի
վրա, Արցախում տեղակայել ռազմական ուժեր և ապա լուծել Վրաստանի խնդիրը:
Ակնհայտ է, որ այս իրողությունը չի գործում վերոնշյալ «սակարկության» գործընթացի
հեշտացման ուղղությամբ: Բայց պետք է լինել միաժամանակ համառ և զգուշավոր, համբերատար
և դիվանագետ: Ռուսաստանի այդ նկրտումները հաջողության լուրջ հավանականություն չունեն
և չեն կարող անվերջ շարունակվել:
Այսպես, միջնաժամկետ առումով
Հայաստանի անվտանգային, տարածաշրջանային և արտաքին առաջնային խնդիրն է նախապատրաստված
լինել այն հավանական սցենարին, երբ Ռուսաստանը հեռացած կլինի այսրկովկասից իսկ ծավալապաշտ
Թուրքիան կփորձի գրավել նրա տեղը:
Հայաստանի` միջնաժամկետ
(15-25 տարի) (քաղաքականությունը, որից պետք է բխեն նաեւ կարճաժամկետ քայլերը, պետք
է հետապնդի հետևյալ նպատակները:
1. Պետական և հասարակական ամբողջական, առավելագույն հնարավոր հզորության ձեռքբերում:
2. Հասարակության հոգեբանական և գործնական մշտական պատրաստվածությամբ և տեխնոլոգիական, գիտատեխնիկական, տնտեսական, ժողովրդագրական ու այլ միջոցների լավագույն օգտագործմամբ, համահայկական
հնարավորությունների ներդրմամբ` սեփական ուժերով բոլոր հակառակորդների նկրտումները
կանխելու, կենսունակ և պաշտպանունակ տարածքներ ու սահմաններ ապահովելու ունակ, հզոր,
անպարտելի ուժի ձեւավորում:
3. Արտաքին հարաբերությունների ոլորտում պետական գերիշխանության հետեւողական
ամրացում, առկա ենթակայեցվածությունների չեղարկում և նոր կախվածությունների առաջացման
բացառում: Այդ համատեքստում,
4. Ռուսաստանի հետ`
ա. Վասալացման, նեոգաղութացման,
գերիշխող/ենթակա հարաբերությունների նոր ձեւաչափերի (Արցախում «խաղաղապահ» ուժերի տեղաբաշխում,
զինված ուժերի միավորում, լեզվական-մշակութային գրոհ եւայլն) բացառում:
բ. - Վասալացման, նեոգաղութացման,
գերիշխող/ենթակա առկա հարաբերությունների չեղարկում:
Տնտեսության, ենթակառուցվածքների, զինված ուժերի, հատուկ ծառայությունների, դիվանագիտության
(բացառությամբ Այսրկովկասյան) և այլ ոլորտներում գերիշխան կամքի ապահովում: Արժանապատիվ, գործընկերային հարաբերությունների
ձեւավորում և ամրագրում:
գ. Պաշտպանական ոլորտում
փոխ շահավետ հիմունքներով պայմանագրային փոխգործակցության ամրագրում: Այսրկովկասում`
բացառապես աշխարհքաղաքական առումով Ռուսաստանի շահերին համահունչ և այդ շահերին հակասող
այլ տերությունների նկրտումներին չսատարող քաղաքականության երաշխավորում և կիրառում:
Այդ փոխհամաձայնության ոգուն չհակասող, սեփական անվտանգության հզորացման նպատակով երրորդ
կողմերի հետ մարտավարական բնույթի համաձայնությունների կայացման իրավունքի ամրագրում:
5. Թուրքիայի` տարածաշրջանային գերուժ, առավել ևս միջազգային ուժ դառնալու
նկրտումները խափանելու աշխատանքների ձեռնարկում, այլ պետությունների և ուժերի կողմից
տարվող նման աշխատանքների սատարում:
6 Աշխարհում տեղի ունեցող համակողմանի համակարգային փոխակերպումների համատեքստում`
համաշխարհային ավելի արդար համակարգի և դրա վրա հիմնված միջազգային հարաբերությունների
ձեւավորման գործընթացներին մասնակցություն և սատարում:
Comments
Post a Comment